कृषी विक्री परवान्यांसाठी ऑनलाईन नोंदणी करण्याचे जिल्हा कृषी अधिकाऱ्यांचे आवाहन

अहमदनगर (जिमाका वृत्तसेवा) : खते, बियाणे आणि किटकनाशके यांच्या विक्रीचे परवाने प्राप्त करून घेण्यासाठी जिल्ह्यातील कृषी विक्रेत्यांनी 'महाआयटी' च्या 'आपले सरकार' पोर्टलवर ३१ जुलै २०२२ पर्यंत ऑनलाईन नोंदणी करावी असे आवाहन जिल्हा अधीक्षक कृषी अधिकारी शिवाजी श्रीरंग जगताप यांनी प्रसिध्दीपत्रकाद्वारे केले आहे.

जिल्ह्यातील कृषि विक्रेत्यांना खते, बियाणे आणि किटकनाशके विक्रीचे डिजीटल स्वाक्षरी असलेले परवाने प्राप्त करण्यासाठी यापुढे नवीन ऑनलाईन प्रणाली विकसित झालेली आहे. सदरचे परवाने जुन्या प्रणालीमधून देण्याचे बंद करण्यात आलेले आहे.परवान्याचे नूतनीकरण आणि सुधारणा  या बाबीही नवीन परवाना 'प्रणालीमधूनच करावयाची आहेत.तरी सद्यस्थितीमध्ये ज्या विक्रेत्यांचे वैध असलेले परवाने आणि वैधता संपलेले परवाने अशा सर्व विक्रेत्यांनी आपले परवान्यांची 'आपले सरकार' या पोर्टलवर (https://aaplesarkar.mahaonline.gov.in/) ऑनलाईन नोंदणी करावी. या प्रक्रियेत विक्रेत्यांना घरबसल्या नोंदणी करुन परवाना प्राप्त करुन घेता येणे शक्य होणार आहे.मात्र यासाठी परवाना धारकांना त्यांचा सद्यस्थितीतील वैध परवाना नवीन प्रणालीवर कार्यान्वित करावा लागणार आहे.ज्या विक्रेत्यांच्या परवान्याची मुदत ३१ जुलैच्या पुढे आहे त्यांनी देखील या नव्याने विकसित झालेल्या ऑनलाईन प्रणालीवर आपला परवाना अद्ययावत करावयाचा आहे.परवाना अद्ययावत करण्यासाठी कोणतेही वेगळे शुल्क भरण्याची गरज नाही.मात्र ऑनलाईन नोंदणी न केल्यास सद्यस्थितीतील परवाना रद्द समजुन त्यावर नियमानुसार योग्य ती कार्यवाही करण्यात येईल असा इशारा जिल्हा अधीक्षक कृषी अधिकारी जगताप यांनी या प्रसिध्दीपत्रकाद्वारे दिला आहे.